Банкны салбарын XVIII чуулган, Банкны салбарын шилдгүүдийг тодруулах хүндэтгэлийн үйл ажиллагаа өнгөрсөн долоо хоногт боллоо.
Монголын Банкны Холбоо (МБХ)-ноос харъяа байгууллагуудтайгаа хамтран жил бүрийн 12 дугаар сарын 8-ны өдөр Банкны салбарын чуулган болон Банкны салбарын шилдгүүд, манлайлагчдыг тодруулдаг хүндэтгэлийн ёслолыг зохион байгуулдаг уламжлалтай.
МБХ-ны харъяа байгууллагууд болох Банк Санхүүгийн Академи, Тогтвортой Санхүүжилтийн Холбоо (ТоС Холбоо), Тэрбум Мод Сангийн нэрэмжит шагналуудыг хүндэтгэлийн ёслолын үеэр гардууллаа.
Банк санхүүгийн салбарын хүний нөөцийг чадавхжуулах, салбарын ажилтнуудын мэдлэг, ур чадварыг сайжруулах их үйлсэд оруулж буй үнэтэй хувь нэмрийг нь үнэлэн, Банк Санхүүгийн Академийн 2023 оны “Шилдэг сургагч багш”-аар “Тэнгэр Даатгал” ХХК-ийн Гүйцэтгэх захирал Ж.Баатарболдыг тодрууллаа.
Шилдэг сургагч багшийг тодруулахдаа Банк Санхүүгийн Академитай хамтран ажилласан тухайн жилийн идэвх оролцоо, сургалтын үнэлгээ зэргийг үндэслэн нэр дэвшүүлж, шагналын хорооны гишүүдийн саналаар сонгодог журамтай билээ.
Нийт гишүүн байгууллагууд болон шагнал хүртсэн салбарын мэргэжилтнүүд, шилдэг сургагч багшдаа талархал илэрхийлж, ажлын өндөр амжилт хүсье!
Ирж буй шинэ онд Та бидний хамтын ажиллагаа улам өргөжин, дэвжих болтугай.
